Ssentebe wa Buganda Yiyo Buganda Yange, Omw. Munaawa Dan, agenyiwaddeko mu Ssaza Bulemeezi okutunulira obusobozi bw'okufunira essomero lya Kangawo Nursery School amazzi amalungi okuyita mu nteekateeka y'ekibiina ey'okukola Bulungibwansi mu masomero g'amabujje mu Bwakabaka bwa Buganda. Nga wano ekibiina kitunulira okugatta Omutindo ku by'enjigiriza wano mu Buganda.
Ssentebe yayaniriziddwa Omukubiriza w'Olukiiko lwe Ssaza, Omw. Ssenku Dan, akikiridde Omwami w'Essaza Oweek. Ronald Mulondo, era nga batambudde n'omukugu mu by'amazzi.
Bano balambudde ebifo eby'enjawulo omuli amazzi, okwabadde ne Bowa Vocational School, era nga wano bayaniriziddwa Omukulu w'essomero lino. Bw'abadde abayaniriza, asanyukidde nnyo enteekateeka eno era bw'atyo ne yeeyama nga essomero okutambula n'ekibiina kino obulungi mukawefube w'okufunira KANGAWO Nursery School amazzi amayonjo. Mu kifo ekirala ekituukiddwako, abakulu abavunaanyizibwa ku kifo kino tebabaddewo.
Ku lwa Kangawo, Omukubiriza yeebazizza ekibiina kya Buganda Yiyo Buganda Yange okulaba nga bavuddeyo okukwasizako Ssaabasajja Kabaka wamu n'abantu be okulaba nga bafunira abasomi b'essomero lino amazzi amayonjo. Bw'atyo akoowodde abantu abalina omutima omulungi okukwasizako ekibiina kino okulaba nga enteekateeka eno etuukirira bulungi.
Omulimu guno gusuubirwa okutandika mu bwangu ddala oluvannyuma lw'akakiiko akakulemberamu omulimu guno okumaliriza okufulumya embalirira eyeetaagisa.
